Ливерпүүл хотын төвд болсон Премьер Лигийн аваргын цомоо тэмдэглэж байсан Ливерпүүлийн багийн шүтэн бишрэгчдийн баяр дээр машин дайрч орж ирэхэд 27 хүн эмнэлэгт хүргэгдсэн бөгөөд үүнээс хоёр нь хүнд гэмтэлтэй байна. Энэ хэрэг нь 5-р сарын 26-нд буюу Даваа гарагт болсон байна.

Цагдаагийн байгууллагаас мэдэгдсэнээр уг машиныг жолоодож байсан гэж үзэж байгаа 53 настай цагаан, Британийн иргэнийг Ливерпүүлийн орчмоос баривчилжээ. Тэрхүү машин нь хойд Английн Ливерпүүл хотод болсон баярын цуглаанд оролцож байсан олон шүтэн бишрэгчдийг дайрсан байна.

Яаралтай тусламжийн албаныхны мэдээлснээр 20 хүнийг газар дээр нь эмчилсэн бол 27 хүнийг эмнэлэгт хүргэжээ. Эмнэлэгт хүргэгдсэн хүмүүсээс дөрөв нь хүүхэд байсан бөгөөд нэг хүүхэд, нэг насанд хүрсэн хүн хүнд байдалтай байгаа аж.

Машинд даруулсан дөрвөн хүнийг галын алба гаргаж авсан байна.

Ослын үеэр хүмүүсийг агаарт хөөргөж буй дүрс бичлэг нийгмийн сүлжээнүүдэд тархаж, үзэгчид цочирдсон байдалтай харагдсан байна.

Машин зогссоны дараа уурласан шүтэн бишрэгчид машин руу дайрч, цонхыг нь хагалахыг оролдож байсан ч цагдаа нар тэднийг зогсоож, жолоочид ойртохоос сэргийлсэн байна.

“Бид энэ үйл явдлыг тусгаарлагдсан хэрэг гэж үзэж байгаа бөгөөд үүнтэй холбоотой өөр хүнийг эрэн сурвалжилж байгаа зүйл алга. Энэ хэрэг нь терроризмтэй холбоотой биш” гэж түр орлон гүйцэтгэгч, дэд комиссар Женни Симс мэдээлэл хийлээ.