Энэтхэг улс “Синдор” нэртэй цэргийн томоохон ажиллагааг явуулсны дараа хэд хэдэн нисэх компаниуд, тэр дундаа Эйр Индиа болон Катар Эйрвэйз Пакистанд аялагчдад зориулсан зөвлөмж гаргалаа. Энэтхэгийн цэргийн ажиллагаа Мягмар гарагийн шөнө Пакистаны есөн террорист байгууллагын эсрэг хийгдсэн байна. Нисэх компаниуд зорчигчдоос аяллын өмнө мэдээллийг шалгаж байхыг анхааруулжээ.

Мягмар гарагийн өглөө Энэтхэгийн СпайсЖет компани мэдэгдэл гаргаж, Дармасала, Лех, Жамму, Сринагар, Амритсар зэрэг нисэх онгоцны буудлууд тодорхойгүй хугацаагаар хаагдахыг зарласан. Үүний зэрэгцээ буцах болон ирэх нислэгүүдэд ч нөлөөлнө гэдгийг онцолсон байна.

Энэтхэгийн цэргийн ажиллагааны дараахан, FlightRadar24 газрын зургаас харвал Пакистаны агаарын орон зайд нисч буй нислэгүүд өөр чиглэлд шилжсэн байжээ. Орон нутгийн иргэд нислэг цуцлагдсан тухай бичлэгүүдийг нийгмийн сүлжээнд оруулж эхэлсэн байна.

Катар Эйрвэйз мөн Пакистанаас нислэгүүдээ түр зогсоосон бөгөөд “Агаарын орон зай хаагдсаны улмаас бид зорчигчдын болон ажилтнуудынхаа аюулгүй байдлыг тэргүүнд тавьж, нөхцөл байдлыг нягт хянаж байна” гэж X платформ дээрээ мэдэгдсэн байна.

Үүний зэрэгцээ АНУ гуравдугаар сарын 7-нд Пакистаны аяллын зөвлөмжийг шинэчилж, ‘3-р түвшин: Аяллаа дахин бодох’-д шилжүүлжээ. АНУ-ын Төрийн департамент өөрийн иргэдийг Пакистанд аялах үеэр террорист үйл ажиллагаа болон зэвсэгт мөргөлдөөн болох боломжтойг сануулсан байна. Тус зөвлөмжид Энэтхэг- Пакистаны хил болон хяналтын шугамын дагуу аялал хийхгүй байхыг анхааруулжээ.

Канад мөн адил Пакистаны бүс нутгийн зөвлөмжийг хадгалж, Афганистан, Хятад, Энэтхэг, Иран зэрэг хилээсээ 50 км-ийн зайтай газар руу аялал хийхгүй байхыг зөвлөж байна.